Sjötíu látnir í skjálftanum

Óttast er að í það minnsta sjötíu manns hafi týnt lífi þegar tveir jarðskjálftar riðu yfir Súmötru í Indónesíu í morgun. Hús hrundu víða til grunna en engra flóðbylgna hefur þó orðið vart.

Fyrri skjálftinn reið yfir laust fyrir klukkan fjögur í nótt að íslenskum tíma og var hann af stærðinni 6,3. Upptök skjálftans voru um fimmtíu kílómetra frá borginni Padang á eynni Súmötru. Hans varð greinilega vart í Singapúr og Malasíu, mörg hundruð kílómetra í burtu. Um tveimur klukkustundum síðar reið seinni skjálftinn yfir en stærð hans var nákvæmlega sex stig.

Að sögn talsmanns indónesísku ríkisstjórnarinnar fyrr í morgun er talið að í það minnsta sjötíu manns hafi týnt lífi í þessum hamförum. Óttast er að enn fleiri hafi látist því vegir hafa rofnað til bæja á skjálftasvæðunum og þar er jafnframt símasambandslaust. Í Padang og nálægum byggðarlögum virðast mörg hundruð hús hafa hreinlega jafnast við jörðu. Þannig beið hópur barna bana þegar skóli þeirra hrundi til grunna í þorpinu Solok.

Sjúkrahús á skjálftasvæðunum eru yfirfull af slösuðu fólki og þar virðist ríkja algert öngþveiti. Mikill ótti greip að vonum um sig á meðal íbúa svæðisins enda er þeim flóðbylgjan mikla á annan dag jóla 2004 enn í fersku minni þegar 130.000 íbúar Súmötru fórust. Engin flóðbylgja virðist hins vegar hafa farið af stað að þessu sinni enda varð skjálftinn undir landi en ekki hafsbotninum.