Ron Artest handtekinn

Framherjinn Ron Artest hjá Sacramento Kings var handtekinn á heimili sínu í dag eftir að kona hringdi í neyðarlínuna þaðan og tilkynnti að hún hefði verið beitt ofbeldi. Artest var færður á lögreglustöð og er þetta í þriðja sinn á nokkrum árum sem hann kemst í kast við lögin á þennan hátt.

Í fréttatilkynningu sagði að Artest hafi verið kærður fyrir heimilisofbeldi og fyrir að beita ofbeldi og hindra konuna við að tilkynna glæp. Talsmaður Sacramento Kings segir að félagið sé að vinna að því að afla upplýsinga um málið.

Artest hefur verið undir smásjánni síðan hann átti upptökin að slagsmálunum ógurlegu í Detroit um árið, en hafði hagað sér nokkuð vel síðan hann gekk í raðir Sacramento á sínum tíma.