Átök á Norðurbrú

Til harðra átaka kom milli lögreglu og mótmælenda á Norðurbrú í Kaupmannahöfn síðdegis. Deilt er um ungdómshúsið svokallaða sem lögregla rýmdi með valdi í morgun. Ungmenni hafa haldið þar til í leyfisleysi síðustu mánuði og hundsað kröfur um að hverfa þaðan. Íslendingur á vettvangi telur líkur á áframhaldandi átökum næstu daga.

Það tók stuttan tíma að rýma húsið. Að sögn lögreglu voru þrjátíu ungmenni þar inni sem öll voru handtekinn auk fjörutíu annarra sem voru fyrir utan. Fjölmargir lögreglumenn tóku þátt í aðgerðinni og var þyrla notuð en úr henni sigu sérsveitarmenn á þak hússins.

Ungmennin brugðust ókvæða við og sóttu hart að lögreglumönnunum. Til harkalegra átaka kom en eftir því sem leið á morguninn róaðist þó hópurinn. Róstur voru þó víða um borgina, þar á meðal í Kristjaníu. Tilgangurinn var talinn sá að tvístra lögreglu.

Mótmæli voru síðan boðuð á Blágarðstorgi í nærri húsinu klukkan fjögur að íslenskum tíma síðdegis. Að sögn danska útvarpsins komu tvö þúsund manns þar saman. Björn Ingi Björnsson, ljósmyndari var þar. Hann segir mótmælendur þegar hafa ráðist á óeinkennisklædda lögreglumenn. Lögregla hafi svarað árásum með táragasi.

David Trads, ristjóri Nyhedsavisen í Danmörku, segir húsið sem hér sé deilt um hafa verið fyrir fimmtán til átján ára sjálfstæð ungmenni sem rekist illa í samfélaginu. Hústökumenn hafi lagt undir sig húsið fyrir 25 árum. Þeir hafi síðan fengið leyfi frá borgarstjórninni í Kaupmannahöfn að halda til í húsinum.

Fyrir 5 árum hafi svo verið ákveðið að selja húsið og því hafi unga fólkið átt að fara út. Það hafi fólkið ekki gert og málið því farið fyrir dóm. Fyrir hálfu ári hafi þeim svo formlega verið skipað að fara en ekki fært sig fet. Því hafi lögregla gert áhlaup á húsið í morgun og rýmt það.

Búist er við mörg þúsund mótmælendum á Ráðhústorginu í Kaupmannahöfn klukkan tíu í kvöld. Óttast er að til átaka komi þar og víðar um borgina, næstu daga.