Bandaríkin munu sitja ráðstefnu í Írak

Bandaríkin hafa staðfest að þau muni sækja ráðstefnu sem stjórnvöld í Írak ætla sér að halda í Apríl. Á henni verða meðal annars fulltrúar frá Íran og Sýrlandi.

Á fundinum á að leita leiða til þess að bæta ástandið í Írak og draga úr spennunni á svæðinu í kring. Bandaríkin hafa undanfarið deilt hart á Írana og Sýrlendinga og sakað þá um að styðja við bakið á uppreisnarmönnum í Írak. Bandaríkin hafa áður hafnað viðræðum með Írönum og Sýrlendingum.

Töluverð pressa hefur þó verið á stjórn George W. Bush, forseta Bandaríkjanna, að hefja viðræður sem Íran og Sýrland eiga aðild að. Skýrsla vinnuhóps sem greindi ástandið í Írak lagði það til en Bush ákvað að taka ekki mark á þeim tillögum.