Ekki vitað til þess að Íslendingar hafi verið í strætisvögnum

Að minnsta kosti sex létust þegar tveir strætisvagnar á leið í gagnstæða átt rákust saman rétt utan við borgina Uppsali í Svíþjóð í morgun. Á fimmta tug til viðbótar slösuðust, þar af nokkrir alvarlega. Ekki er vitað til þess að Íslendingar hafi verið á ferð með strætisvögnunum.

Slysið varð á áttunda tímanum í morgun nærri Lejsta, sem er um 20 kílómetra norð-austur af Uppsölum. Strætisvagnarnir voru báðir fullir af fólki. Þrír eru sagðir í lífshættu og sjö alvarlega slasaðir. 30 til 40 til viðbótar hlutu minni áverka.

10 sjúkrabílar frá öllum nærliggjandi borgum voru kallaðir á vettvang. Erfiðlega gekk að komast að slösuðum í strætisvögnunum þar sem þeir fóru afara illa í árekstrinum og sem dæmi rifnaði nær öll önnur hliðin af örðum þeirra. Þeir höfnuðu báðir utan vegar.

Þyrlur fluttu þá sem verst voru slasaðir á Háskólasjúkrahúsið í Uppsölum. Vitni að slysinu fengu þegar áfallahjálp, sem og þeir sem slösuðust lítillega.

Séra Ágúst Einarsson, prestur Íslensku kirkjunnar í Svíþjóð, sagði í samtali við fréttastofu í morgun að hann hefði ekki frétt af því að nokkurn Íslending hefði sakað í slysinu en fjölmargir Íslendingar eru búsettir á svæðinu.

Ekki er vitað með vissu hvað olli slysinu en töluverð hálka var á veginum. Honum var þegar lokað.