Emil undir smásjánni hjá Viking

Emil Hallfreðsson, landsliðsmaður hjá Tottenham, er undir smásjánni hjá norska úrvalsdeildarliðinu Viking sem vill fá vængmanninn flinka í sínar raðir fyrir komandi tímabil. Egil Östenstad, framkvæmdastjóri Viking, hefur staðfest að félagið hafi spurst fyrir um Emil.

"Við höfum haft samband við Tottenham en eiginlegar viðræður eru ekki hafnar. Við höfum áhuga á Emil, hann er öðruvísi leikmaður en þeir sem við höfum þegar innan raða okkar," sagði Östenstad.

Hjá Viking er fyrir að finna landsliðsmanninn Hannes Þ. Sigurðsson, sem gekki í raðir liðsins frá Bröndby fyrir skemmstu.