Eddie Jones á leið til Miami á ný

Hinn fjölhæfi Eddie Jones hjá Memphis Grizzlies er nú að ganga frá því að verða keyptur út úr samningi sínum við félagið og fregnir herma að hann muni ganga í raðir meistara Miami Heat á morgun. Jones, sem bæði getur spilað sem bakvörður og framherji, spilaði í sex ár með Miami á sínum tíma.

Jones er nýkominn af stað í vetur eftir meiðsli og hefur aldrei á ferlinum skorað eins lítið og í vetur (5,6 stig) - en hann er með um 16 stig að meðaltali á ferlinum. Jones er 35 ára gamall og búist er við því að hann muni slá um 300.000 dollara af þeim rausnarlegu 15,7 milljónum sem hann fær í laun frá Memphis á árinu. Honum verður svo frjálst að semja við Miami fyrir mun lægri upphæð og gæti orðið klár í slaginn þegar Miami mætir Cleveland annað kvöld.