Þrettán í röð hjá Phoenix Suns

Phoenix Suns burstaði Minnesota Timberwolves 131-102 í NBA í nótt og vann þar með sinn 13. leik í röð. Amare Stoudemire skoraði 25 stig fyrir Phoenix, Leandro Barbosa 20 og Shawn Marion skoraði 17 stig og hirti 20 fráköst. Randy Foye skoraði 25 stig fyrir Minnesota.

San Antonio vann öruggan sigur á Philadelphia á útivelli 99-85. Brent Barry skoraði 23 stig fyrir San Antonio og Tim Duncan skoraði 17 stig og hirti 15 fráköst. Andre Iquodala skoraði 20 stig fyrir Philadelphia.

Portland skellti Milwaukee á heimavelli 99-95 þar sem Brandon Roy setti persónulegt met með 28 stigum og hirti auk þess 9 fráköst, en Earl Boykins skoraði sömuleiðis 28 stig fyrir Milwaukee.

Þá var leikur Miami og Dallas fyrr í gær, en greint var frá úrslitum þess leiks í gærkvöld. Þar hafði Dallas sigur og náði að hefna ófaranna síðan í úrslitunum í sumar.