Dallas vann stóran sigur í San Antonio

Dallas vann í nótt 13. sigurinn í röð í NBA deildinni þegar liðið skellti erkifjendum sínum í San Antonio 90-85 á útivelli. Leikurinn, sem sýndur var beint á Sýn, var æsispennandi allt til loka og nú hefur Dallas unnið þrjá leiki í röð í San Antonio.

Dirk Nowitzki átti stórleik fyrir Dallas og skoraði 36 stig, en Manu Ginobili skoraði 25 stig fyrir San Antonio. Þetta var þriðja tap San Antonio í röð.

Gilbert Arenas hélt upp á 25 ára afmæli sitt með 35 stigum fyrir Washington í sigri á LA Clippers 116-105. Arenas skoraði megnið af stigum sínum í fyrri hálfleik og brunaði beint í afmælisveislu sína eftir leikinn. Hann gaf auk þess 12 stoðsendingar í leiknum.

Orlando vann þriðja leikinn í röð með sigri á Charlotte 106-74. Matt Carroll skoraði 19 stig fyrir Charlotte en Dwight Howard skoraði 22 stig og hirti 12 fráköst fyrir Orlando - og skoraði m.a. sína fyrstu þriggja stiga körfu á ferlinum.

Toronto færði Atlanta áttunda tapið í röð með 105-92 sigri á heimavelli. Chris Bosh skoraði 21 stig fyrir Toronto en Marvin Williams skoraði 24 stig fyrir Atlanta.

New Jersey lagði Chicago 91-86. Vince Carter skoraði 21 stig fyrir New Jersey en Luol Deng skoraði 22 stig fyrir Chicago.

Kevin Garnett tryggði Minnesota 104-102 sigur á Philadelphia með körfu á lokasekúndu framlengingar. Garnett skoraði 25 stig og hirti 14 fráköst, en Kyle Korver skoraði 25 stig fyrir Philadelphia.

Houston vann auðveldan sigur á Utah og sinn fimmta í röð 100-86. Tracy McGrady skoraði 44 stig fyrir Houston og Dikembe Mutombo hirti 19 fráköst. Deron Williams skoraði 19 stig fyrir Utah.

Cleveland lagði Milwaukee 95-86 þar sem Drew Gooden skoraði 31 stig og hirti 16 fráköst fyrir Cleveland en Michael Redd skoraði 26 stig fyrir Milwaukee.

LA Lakers lagði Denver 123-104 á heimavelli þar sem Smush Parker skoraði 23 stig fyrir Lakers en Earl Boykins var með 24 stig fyrir Denver. Þetta var 899. sigur Phil Jackson þjálfara Lakers á ferlinum.

Phoenix vann auðveldan sigur á Miami 108-80. Steve Nash skoraði 22 stig fyrir Phoenix en Alonzo Mourning skoraði 15 stig fyrir Miami.

Loks vann New York auðveldan útisigur í Seattle 111-93 þar sem Stephon Marbury skoraði 28 stig fyrir New York en Chris Wilcox skoraði 13 stig fyrir Seattle.