Koss í farbann

Ljósmynd af tveimur rússneskum lögreglumönnum sem kyssast í skógi vöxnu vetrarlandslagi hefur valdið þó nokkrum usla í rússnesku menningarlífi.

Ljósmyndin er verk listahópsins Bláu nefin, sem vildi með henni votta þekktu verki eftir graffarann Banksy virðingu sína. Myndin hefur verið til sýnis undanfarið í Tretyakov-listasafninu í Moskvu. Safnið stendur að sýningu á rússneskri samtímalist í París í vikunni en menningarmálaráðherra Rússlands, Alexander Sokolov, hefur ákveðið að myndin umdeilda fái ekki að vera með.

„Birtist þessi mynd í París mun hún eingöngu kalla skömm yfir rússneska menningu. Því er ótækt að senda þetta klám til Parísar,“ sagði ráðherrann spurður um ákvörðun sína.

Ráðherrann setti annað verk eftir blánefjahópinn einnig í farbann, en það er mynd sem sýnir Vladimír Pútín, George W. Bush og Osama bin Laden hoppa um í hjónarúmi á nærfötunum einum klæða.

Listamennirnir eru að vonum ekki ánægðir með ákvörðun ráðherrans. „Ríkisafskipti af menningarlífi og listsköpun í Rússlandi eru að komast á sama stig og var undir stjórn Krústsjevs,“ sagði Alexander Shaburov sem er annar tveggja listamanna í Bláu nefjunum.

Ljósmyndinni af lögreglumönnunum var ætlað að vera draumsýn um umburðarlyndan og ástríkan heim. „Ef tekið er tillit til þess að verkið hefur verið bannfært af ríkinu er klárt að draumsýnin er ekki við það að rætast,“ sagði Shaburov. -vþ