Sportlegur glæsifatnaður

Belgíski hönnuðurinn Dries Van Noten er snillingur í að blanda formlegum og fínum stíl við hinn hversdagslega. Í sumarlínu sinni fyrir 2007 kynnti hann eins konar sportklæðnað sem var þó ekki ætlaður til íþróttaiðkunar heldur var um að ræða íþróttafatnað úr einstaklega fínum og gerðarlegum efnum.

Hælaskórnir sem hann paraði við voru eins og háhælaðir íþróttaskór en í bland við þetta allt voru pallíettujakkar og töffaraleg förðun.

Þessu útliti er alls ekki erfitt að ná. Sportlegir parka-jakkar, víðar stuttbuxur, bómullarbolir og kannski jafnvel töffaralegir, marglitaðir pallíettujakkar og eitthvað röndótt er það eina sem þarf.

Litirnir eru flestir í daufari kantinum. Grár, ljósbrúnn, hvítur og svartur en í bland eru sterkir litir eins og gulgrænn, dökkbleikur og blár. Til að fullkomna þetta þarf svo hvít eða ljós sólgleraugu með dökku gleri.