Tottenham vill fá Upson

Martin Jol, knattspyrnustjóri Tottenham, mun hafa beint spjótum sínum að Matthew Upson, varnarmanni Birmingham, eftir að ljóst væri að hann fengi ekki Curtis Davies frá WBA þegar leikmannaglugginn opnast að nýju í janúar.

Upson er kominn á gott skrið eftir að hafa átt í slæmum meiðslum síðustu mánuði en hefur tilkynnt forráðamönnum Birmingham að hann hafi ekki áhuga á að endurnýja samning sinn við félagið – sem þó rennur út eftir 18 mánuði. Hins vegar gæti vel farið svo að Birmingham myndi hlusta á tilboð í varnarmanninn í stað þess að eiga á hættu að missa hann fyrir ekki neitt eftir næsta tímabil.