Curbishley fær tíma og peninga

Eggert Magnússon, stjórnarformaður West Ham, hefur lýst því yfir að Alan Curbishley knattspyrnustjóri muni fá allan þann tíma og fjármuni sem hann þarf til að koma West Ham á réttan kjöl í vetur.

"Ég vona að Alan verði lengi hjá félaginu og nái frábærum árangri, en við verðum að vera þolinmóðir því það tekur tíma að byggja upp gott lið. Við höfum ekki sett okkur annað takmark en að sleppa við fall úr deildinni og ég trúi því að Alan sé rétti maðurinn til að afstýra því. Hann þarf því bara að segja mér hvaða leikmenn hann telur sig þurfa til að styrkja liðið og við munum ná í þá, ef verðmiðinn er innan skynsamlegra marka," sagði Eggert í samtali við breska sjónvarpið.