Glazer-feðgar ætla að opna budduna

Glazer-feðgarnir amerísku sem eiga Manchester United, hafa gefið grænt ljós á að opna budduna í janúar til að styrkja leikmannahóp liðsins - að því gefnu að góðir menn finnist. Hópur United þykir nokkuð þunnur og því er ljóst að félagið verður helst að verða sér út um liðsstyrk í janúar fyrir lokaátökin.

"Við höfum ekki rætt fyrirhuguð leikmannakaup sérstaklega, en það eru til peningar" sagði David Gill framkvæmdastjóri. "Ef við finnum mann sem við höldum að geti hjálpað liðinu, verða fjármunir ekki fyrirstaða."