Of gott lið til að falla

Eggert Magnússon segist hafa fulla trú á liði sínu West Ham í ensku úrvalsdeildinni í vetur og segir liðið einfaldlega allt of gott til að falla í fyrstu deild. Hann á von á að liðið rétti fljótlega úr kútnum og nái jafnvel að ljúka keppni um miðja deild í vor.

"Mitt markmið er að ná að ljúka keppni um miðja töflu í vor og byggja svo á því á næsta tímabili. Ég held að liðið sé miklu betra en staða þess í deildinni segir til um í augnablikinu og vonandi nær liðið að rétta úr kútnum sem fyrst. Ég hef ekki miklar áhyggjur, því ég veit að liðið er of gott til að falla um deild. Það er mikið eftir af tímabilinu ennþá og ég trúi ekki öðru en að sjálfstraustið fari að aukast hjá mönnum eftir þrjá heimasigra í röð," sagði Eggert.