KR tapaði óvænt í Hveragerði

Skallagrímur komst upp að hlið KR og Snæfells á topp Iceland Express-deild karla í körfubolta eftir tiltölulega auðveldan sigur á Þór á Þorlákshöfn í kvöld, 98-80. Á sama tíma tapaði topplið KR fyrir Hamar/Selfoss í Hveragerði, 83-69. Fjórir leikir voru á dagskrá í kvöld.

Úrslitin í hinum leikjum kvöldsins voru á þann veg að Íslandsmeistarar Njarðvík lögðu Fjölni af velli, 96-82, og Keflavík vann góðan sigur á Tindastól á útivelli, 98-83. Njarðvík og Keflavík eru bæði með 12 stig í 4. og 5. sæti deildarinnar en hafa spilað einum leik minna en toppliðin. Skallagrímur, KR og Snæfell eru öll með 14 stig.

Snæfell getur komist í toppsætið annað kvöld, en þá mætir liðið Grindavík.