Skautasvell á Ingólfstorgi í desember

Skautasvell verður opnað á Ingólfstorgi þann 7. desember og verður opið til mánaðarloka. Það er Tryggingamiðstöðin, sem er með höfuðstöðvar sínar við Aðalstræti, sem setur svellið upp í samvinnu við borgina og er það gert vegna 50 ára afmælis félagsins sem einmitt verður haldið hátíðlegt þann 7. desember næstkomandi. Með þesu vill Tryggingamiðstöðin hvetja höfuðborgarbúa og landsmenn til að njóta góðrar samveru og hollrar útivistar. Eina skilyrði sem fyrirtækið setur við notkun á svellinu er að fyllsta öryggis sé gætt. Öllum er frjálst að koma með eigin skauta og hjálm en jafnframt verður boðið upp á leigu á skautum og hjálmum við svellið fyrir þá sem ekki eiga slíkt.