Robben varar Mourinho við að kaupa Malouda

Arjen Robben, hollenski sóknarmaðurinn hjá Chelsea, hefur varað forráðamenn Chelsea við því að kaupa Florent Malouda frá Lyon. Robben nánast hótar því að fara frá félaginu ef franski landsliðsmaðurinn verður keyptur í janúar.

News of the World segir frá þessu í morgun og er talið að Jose Mourinho sé að undirbúa 15 milljón punda tilboð í Malouda þegar leikmannaglugginn opnar í janúar, en hann er á mála hjá Lyon og spilar í sömu stöðu og Robben.

Hinn 22 ára gamli Robben hefur ekki átt fast sæti í liði Chelsea á leiktíðinni og virðist ekki passa inn í hið nýja leikkerfi sem Mourinho er að láta lið sitt spila.

"Ef ég er ekki í liðinu verð ég eðlilega að skoða hvaða aðra möguleika ég hef. Chelsea hefur sagt að ég muni spila meira þegar líður á tímabilið svo að ég vill ekki vera með neinar yfirlýsingar strax," sagði Robben og bætti því við að hann hefði engan áhuga á því að þiggja há laun fyrir að sitja á bekknum. "Það eru nokkrir í liðinu sem gera það en ég vill það ekki. Ég er alltof ungur."