Markalaust hjá Middlesbrough og Liverpool

Útivallagrýla Liverpool hélt áfram í dag þegar liðið gerði markalaust jafntefli við Middlesbrough á útivelli í ensku úrvalsdeildinni. Liverpool hefur nú hlotið tvö stig í sjö útileikjum tímabilsins og skorað í þeim eitt mark.

Athygli vakti að Steven Gerrard spilaði á miðri miðjunni hjá Liverpool í leiknum og virtist það hafa nokkuð góð áhrif á leik liðsins. Yfirburðir þeirra rauðklæddu voru töluverðir og má segja að heimamenn hafi verið stálheppnir að fá ekki á sig mark. Næst komst Peter Crouch því að skora í blálokin en Jonathan Woodgate bjargaði á marklínu.

Liverpool er í 9. sæti deildarinnar eftir jafnteflið með 18 stig en Moddlesbrough er í því 14. með 14 stig.