Webber ósáttur við hlutskipti sitt

Framherjinn Chris Webber hjá Philadelphia 76ers hefur farið fram á fund með eiganda liðsins og lýst yfir óánægju sinni með það hvað hann fær lítið að spila. Webber skoraði aðeins 6 stig á 23 mínútum í síðasta leik með liði sínu.

"Ég held ekki áfram að spila eins og einhver aukaleikari hjá liðinu. Ég er ósáttur við þetta hlutskipti og þið getið tekið því eins og þið viljið," sagði Webber óhress við blaðamenn eftir leikinn.

Webber hefur verið einn af bestu leikmönnum deildarinnar í áraraðir, en varanleg hnémeiðsli eru farin að taka verulegan toll af honum. Webber hefur auk þess verið duglegur að koma sér út í horn hjá liðum sínum í gegn um árin eftir að hafa hlaupið í fjölmiðla og farið að væla yfir hlutskipti sínu.