Valencia hefur augastað á Lippi og Buffon

Fréttir á Spáni herma að yfirmaður knattspyrnumála hjá Valencia hafi lýst því yfir að félagið ætli sér að hreppa Ítalana Marcello Lippi og Gianluigi Buffon til liðs við sig á næstunni. Þetta var rætt á stjórnarfundi hjá félaginu.

"Meginmarkmið okkar er að fá þjálfarann Marcelo Lippi hingað, sem og markvörðinn Gianluigi Buffon," sagði Amedeo Carboni hjá Valencia. Lippi gerði landslið Ítala að heimsmeisturum í sumar en hefur verið atvinnulaus síðan, en Buffon ver enn mark Juventus sem nú er í B-deildinni á Ítalíu.

Ekki fylgdi sögunni hvort núverandi þjálfari Valencia, Quique Sanchez Flores, sem hefur náð ágætum árangri í uppbyggingu á liði Valencia. Hitt er svo annað mál með markvarðarstöðuna, en hinn gamalreyndi Santiago Canizares hefur enn ekki undirritað nýjan samning við félagið.