Dregur úr ummælum Berlusconi

Andriy Shevchenko, leikmaður Chelsea, hefur dregið úr ummælum Silvio Berlusconi forseta AC Milan um helgina þar sem forsetinn sagði Shevchenko hafa lýst því yfir í samtali við sig að hann langaði að snúa aftur til Ítalíu og spila með Milan.

"Það er ekkert til í því að ég vilji fara aftur til Ítalíu, ég var nú bara að reyna að vera kurteis," sagði Shevchenko í samtali við ítalska fjölmiðla í dag. Adriano Galliani, varaforseti Milan, sagði aukinheldur að þó svo að Shevchenko vildi koma aftur til Milan - væri það ekki hægt, því annar maður væri búinn að taka sæti hans í liðinu.