Enn tapar West Ham

Ógæfa enska úrvalsdeildarliðsins West Ham virðist engan endi ætla að taka og í kvöld féll liðið úr keppni í enska deildarbikarnum með því að tapa 2-1 fyrir liði Chesterfield sem leikur í 2. deildinni.

Marlon Harewood kom gestunum yfir í upphafi leiks, en eftir það var 2. deildarliðið einfaldlega sterkari aðilinn á vellinum og vann verðskuldaðan 2-1 sigur með mörkum frá Colin Larkin á 54. mínútu og Caleb Folan á 86. mínútu.

Leeds steinlá 3-1 á heimavelli fyrir Southend, Notts County sendi Southampton úr keppni með 2-0 sigri á heimavelli, Sheffield United tapaði 4-2 heima fyrir Birmingham, Watford lagði Hull 2-1, Arsenal lagði West Brom 2-0 með tveimur mörkum frá Jeremie Aliadiere og Everton var 3-0 yfir gegn Luton þegar 5 mínútur voru til leiksloka með mörkum frá Cahill og McFadden, en eitt markið var sjálfsmark.

Leikur Leicester og Aston Villa fór í framlengingu eftir að staðan var 2-2 eftir venjulegan leiktíma og sömu sögu var að segja af leikjum Port Vale og Norwich og Wicombe og Doncaster.