Stilian Petrov hættur með landsliðinu

Stilian Petrov, fyrirliði Búlgarska landsliðsins og leikmaður Aston Villa í ensku úrvalsdeildinni, hefur gefið það út að hann sé hættur að spila með búlgarska landsliðinu.

Petrov segir ástæðuna vera erfitt samstarf við Hristo Stoichkov landsliðsþjálfara. "Ég vil ekki spila með landsliðinu undir stjórn Stoichkov. Ég geri mér grein fyrir því að þessi ákvörðun kemur ef til vill flatt upp á forráðamenn landsliðsins, en þetta er engin skyndiákvörðun hjá mér - ég er búinn að hugsa málið rækilega," sagði hinn 27 ára gamli miðjumaður.

Stoichkov segist vonast til þess að leikmanninum snúist hugur. "Ég vona að Stilian taki sér nokkra daga til að hugsa málið betur. Ég hætti nú sjálfur að spila með landsliðinu á sínum tíma, en sneri samt aftur," sagði Stoichkov.