Framherjinn skæði Louis Saha hjá Manchester United verður ekki í byrjunarliði Frakka á Hamden Park á morgun þegar silfurliðið frá HM mætir Skotum í undankeppni EM. Miðjumaðurinn Patrick Vieira kom aftur vel út úr læknisskoðun í kvöld og hefur verið dæmdur nógu heill til að spila á morgun.
Óttast var að Vieira hefði meitt sig alvarlega á æfingu í gær eftir samstuð við félaga sinn Lilian Thuram, en nánari skoðun leiddi í ljós að meiðslin voru ekki alvarleg. Þeir William Gallas og Willy Sagnol hafa fengið grænt ljós á að standa í vörn Frakka gegn Skotum á morgun.
Thierry Henry verður að venju í framlínu franska liðsins en það kemur líklega í hlut David Trezeguet eða Nicolas Anelka að leika við hlið hans í fjarveru þeirra Saha og Sidney Govou.
