Segir Tevez og Mascherano að fara frá West Ham

Nýráðinn landsliðsþjálfari Argentínu er ekki að skafa af því í viðtali á vefsíðu þar í landi í dag og segir að þeir Javier Mascherano og Carlos Tevez ættu að hypja sig frá West Ham því það henti þeim alls ekki að spila fyrir liðið.

"Það er sorglegt að sjá þá spila fyrir West Ham. Þeir virka áhugalausir og gera allt með hangandi hendi. Ég held að þeir ættu frekar að reyna að finna sér annað lið til að spila fyrir og ég held að Mascherano væri til að mynda betur settur hjá Juventus í B-deildinni á Ítalíu. Tevez getur líka spilað hvaða stöðu sem er, en hann er notaður á vinstri kantinum hjá West Ham og þar kemur lítið sem ekkert út úr honum," sagði landsliðsþjálfarinn Alfio Basile.