Blæs í herlúðra

Lawrie Sanchez hefur lýst því yfir að hann ætli sér að krækja í fjögur stig út úr viðureignum Norður-Íra við Dani og Letta á næstu viku. Norður-Írar hafa fengið þrjú stig úr fyrstu tveimur leikjum sínum í F-riðlinum.

Írarnir sækja Dani heim á Parken á laugardaginn og þar ætlar Sanchez sér að ná hagstæðum úrslitum. "Ef við náum jafntefli á Parken og leggjum Letta í næstu viku, verða það fjögur stig í viðbót í safnið og það verður áhugavert að sjá í hvorn flokkinn fólk setur okkur eftir þriðja leik okkar - því við vorum jarðaðir eftir fyrsta leikinn (tap gegn Íslendingum í Belfast) en hylltir eftir annan leikinn (sigur á Spánverjum í Belfast)," sagði Sanchez.