Slasaði þjálfara sinn með troðslu

Nýliðinn Ryan Hollins hjá Charlotte Bobcats á ef til vill ekki eftir að skrá nafn sitt á spjöld sögunnar í NBA deildinni í vetur en í dag tryggði hann að aðstoðarþjálfari liðsins á ekki eftir að gleyma honum í bráð.

Hollins tók hressilega á því í æfingabúðum liðsins í húsnæði Norður-Karólínu háskólans þar sem það er nú við æfingar, en í óðagotinu sleit hann niður eina körfuna í troðslu með þeim afleiðingum að hún féll á aðstoðarþjálfarann Jeff Capel.

Þjálfarinn meiddist nokkuð á öðrum handleggnum sem hann bar fyrir sig þegar karfan og fylgihlutir hennar hrundu yfir hann. Meiðsli hans voru þó ekki alvarleg en þegar hann var spurður hvernig hann væri í öxlinni svaraði hann því til að það hefði verið skárra að fá spjaldið í handlegginn en í höfuðið.