Dida hættur

Markvörðurinn Dida hjá AC Milan hefur tilkynnt landsliðsþjálfara sínum Dunga að hann gefi ekki kost á sér í brasilíska landsliðið á næstunni, en þessi 32 ára gamli markvörður hefur verið í hópnum á síðustu þremur heimsmeistaramótum.

Dunga var ekki par hrifinn af þessari ákvörðun markvarðarins og sagði hann ekki þurfa að eiga von á því að gengið yrði á eftir sér í framtíðinni og sagði honum að gleyma því að reyna að snúa aftur ef sér snerist hugur.

"Ef menn eru ekki tilbúnir að fórna sál og líkama fyrir landsliðið eiga þeir ekki að spila fyrir það. Við höfum ekkert við leikmenn að gera sem vilja ekki spila fyrir Brasilíu," sagði Dunga.

Markvarðarstaðan hefur oftar en ekki verið veikasti hlekkur í sterku liði Brasilíumanna, en Dida hefur verið besti markvörður liðsins á síðustu tveimur áratugum. Hann spilaði sinn fyrsta landsleik árið 1997 og lék alls 92 sinnum fyrir þá gulklæddu.