Markið hans Van Persie var stórkostlegt

Arsene Wenger var mjög ánægður með frammistöðu sinna manna í dag þegar Arsenal náði að leggja Charlton 2-1 á útivelli eftir að hafa lent undir 1-0. Það var Robin Van Persie sem stal senunni og skoraði bæði mörk Arsenal og það síðara er þegar skráð sem eitt af mörkum tímabilsins.

"Ég var með alla mína athygli á leiknum," sagði Wenger sem á 10 ára starfsafmæli um þessar mundir, þegar hann var spurður hvort það hefði verið sérstakt að fá sigur í tilefni áfangans. "Það er verðugt verkefni að þurfa að mæta liði eins og Charlton á útivelli eftir leik í meistaradeildinni í vikunni. Þeir voru ekki með mikið sjálfstraust í upphafi leiks, en það jókst til muna eftir að þeir náðu að skora og því þurftum við að keyra upp hraðann. Mínir menn sýndu hungrið sem til þurfti í dag og ég er mjög ánægður að ná sigri hér," sagði Wenger og hrósaði Robin Van Persie fyrir mark sitt.

"Menn skora svona mörk bara einu sinni á ferlinum. Hann fékk mjög góða fyrirgjöf, en þegar hann skaut, hélt ég að boltinn væri að fara framhjá markinu," sagði Wenger ánægður.

Charlton átti þó skilið að fá stig út úr leiknum í dag. Darren Bent hafði komið heimamönnum yfir eftir undirbúning Hermanns Hreiðarssonar og Jens Lehmann stóð vaktina vel í marki Arsenal. Undir lok leiksins átti Charlton svo að fá vítaspyrnu þegar boltanum var spyrnt í hönd William Gallas, en dómarinn sá ekki ástæðu til að dæma víti.

"Dómarinn gerði mistök, en við gerum allir mistök. Það er tilgangslaust fyrir mig að vera að væla yfir því - ég bíð bara eftir því að hann hringi í mig í kvöld og viðurkenni mistökin," sagði Ian Dowie, stjóri Charlton.