Sameiginlegt prófkjör hjá Vg á höfuðborgarsvæðinu

Vinstri - grænir hafa ákveðið að halda sameiginlegt forval í báðum Reykjavíkurkjördæmunum og Suðvesturkjördæmi fyrir komandi þingkosningar. Þetta varð ljóst eftir að kjördæmisráð flokksins í Suðvesturkjördæmi samþykkti tillögu þar að lútandi á fimmtudag.

Ekki hefur verið ákveðið hvenær forvalið fer fram en tilkynnt verður um dagsetningu fljótlega. Forvalið verður opið félagsmönnum á svæðinu en þar verða fjórir efstu frambjóðendur flokksins í hverju kjördæmi kosnir. Kjósandi gefur þannig þremur frambjóðendum númerið eitt, þremur númerið tvö og svo framvegis. Fram kemur á vef Vinstri - grænna að tryggja skuli jafnræði kynja við uppröðun á listana en úrslit forvalsins eru leiðbeinandi fyrir kjörnefnd.