Aston Villa yfir gegn Scunthorpe

Fimm leikir eru á dagskrá kvöldsins í enska deildarbikarnum og annað kvöldið í röð eru litlu liðin að stríða úrvalsdeildarliðunum. Aston Villa er ekki eitt þeirra, en liðið hefur 1-0 forystu gegn Scunthorpe í leik sem sýndur er beint á Sýn.

Það var Juan Pablo Angel sem skoraði mark Villa skömmu áður en flautað var til leikhlés, en hann náði að fylgja eftir vítaspyrnu sem hann klúðraði á 42. mínútu.

Manchester City hefur yfir 1-0 á útivelli gegn Chesterfield og Doncaster er að vinna Derby 2-0. Úrvalsdeildarlið Fulham er hinsvegar í vondum málum, því liðið er 2-0 undir á heimavelli sínum gegn Wycombe. Heiðar Helguson er í byrjunarliði Fulham í kvöld. Sömu sögu er að segja af Middlesbrough sem er að tapa heima fyrir fyrrum lærisveinum Guðjóns Þórðarsonar í þriðjudeildarliði Notts County.

Einn leikur fer svo fram í ensku úrvalsdeildinni og þar hefur Liverpool 1-0 yfir gegn Newcastle á heimavelli sínum Anfield Road þar sem Dirk Kuyt skoraði mark þeirra rauðu.