Thatcher sleppur ótrúlega vel

Varnarmaðurinn Ben Thatcher hjá Manchester City hefur verið dæmdur í átta leikja bann af aganefnd enska knattspyrnusambandsins eftir líkamsárás sína á Pedro Mendes hjá Portsmouth í leik liðanna á dögunum. Thatcher hefur þegar tekið út tvo leiki af sex sem hann fékk í bann frá City og missir því aðeins af sex leikjum í viðbót með liði sínu.

Ekki er annað hægt að segja en að Thatcher sleppi ótrúlega vel eftir árás sína, en hann verður auk þessa á skilorði í tvö ár og þarf að taka út 15 leikja bann ef hann brýtur það. Það breytir ekki þeirri staðreynd að úrskurður aganefndarinnar er hreint út sagt hlægilegur, enda var árás Thatcher mjög fólskuleg og lítið hefði mátt út af bera til að Mendes hlyti af varanlegan skaða.