Sættast Zidane og Materazzi?

Alþjóða Knattspyrnusambandið, FIFA, vinnur nú í því að fá franska snillinginn Zinedine Zidane og ítalska varnarmanninn Marco Materazzi til þess að hittast opinberlega og sættast. Eins og frægt er orðið lenti þeim saman í úrslitaleik HM í sumar þar sem Zidane skallaði Materazzi í bringuna.

Sepp Blatter, forseti FIFA, hefur beðið Zidane og Materazzi um að hittast

niður í Suður Afríku þar sem næsta heimsmeistarakeppni mun fara fram eftir 4 ár. Ekki fer enn neinum sögum af því hvernig þeir tvímenningarnir hafa tekið í bón forsetans sem vill gera opinberan viðburð úr uppákomunni og ljúka málinu í eitt skipti fyrir öll.

Zidane var sektaður fyrir framkomu sína í úrsltaleik HM og dæmdur í leikbann en þar sem hann hefur lagt skóna á hilluna sættist hann á að taka refsinguna út í samfélagsþjónustu í þágu knattspyrnunnar. Blatter hefur uppi þessa hugmynd um að samfélagsþjónusta Zidanes feli í sér að bæta fyrir hegðun sína með fyrrgreindri uppákomu en einnig til að bæta ímynd íþróttarinnar sem beið hnekki með atvikinu í úrslitaleik HM sem er orðið að einkenni keppninnar.

Materazzi upplýsti loks í síðustu viku hvað það var sem fór þeim á milli

þegar atvikið átti sér stað í útslialeiknum í Þýskalandi í sumar. Materazzi

togaði í treyjuna hans Zidane í leiknum og segir Ítalinn að Zidane hafi þá

boðist til að gefa honum treyjuna sína ef hann langaði svona mikið í hana.

Því svaraði sá ítalski til að hann langaði meira í systur Zidane sem þá

hafi skallað sig í bringuna eins og frægt er orðið.

Helst kemur til greina að Materazzi og Zidane muni hittast fyrir framan

fjölmiðla í hinu alræmda fangelsi á Robben eyju þar sem Nelson Mandela

fyrrum forseti Suður Afríku sat bak við rimla í 27 ár. Það var fyrrverandi

fangi á Robben eyju sem sagði frá þessu í viðtali við suður afríska

dagblaðið Sunday Times en hann er í undirbúningsnefnd fyrir HM 2010 sem fram fer í landinu. Hann sagðist vera vel á veg kominn í samningaviðræðum við Blatter sem segir þetta í raun einu leiðina til að ljúka málinu.

Þess má til gamans geta að fyrrverandi tukthúslimurinn sem um ræðir og er í undirbúningsnefnd HM 2010 ber hið skemmtilega nafn Tokyo Sexwale.