Alltaf erfitt að mæta Liverpool

David Moyes segir sína menn í Everton vera tilbúna í slaginn fyrir grannaslaginn við Liverpool á Goodison Park á hádegi á morgun, en jafnan er heitt í kolunum þegar þessir erkifjendur frá Liverpool borg eigast við á knattspyrnuvellinum.

"Það er alltaf gríðarlega erfitt að mæta Liverpool og við verðum að vera tilbúnir í slaginn gegn þeim. Liverpool er með stóran hóp og hafa keypt fjölda leikmanna, slíkan munað getum við ekki leyft okkur. Ef við spilum hinsvegar eins vel og við gerðum gegn Tottenham á dögunum, hef ég engar áhyggjur af leiknum," sagði Moyes og hrósaði sérstaklega framherjanum Andy Johnson fyrir sitt framlag í þeim leik.

"Andy er búinn að sýna það og sanna að hann er markaskorari í þessari deild og hann styrkir hóp okkar gríðarlega með hraða sínum og hæfileika til að skora mörk," sagði Moyes.