Ráðist á sjónvarpsfréttamann

Sjónvarpsfréttamaður í San Diego þurfti að leggjast inn á sjúkrahús eftir að maður og kona sem hann var að fylgjast með fyrir sjónvarpsþátt réðust á hann, börðu og bitu. Fréttamaðurinn hafði komist á snoðir um umfangsmikið fasteignasvindl sem maðurinn stóð fyrir og var að taka viðtal við annan mann í tengslum við málið. Á myndbandsupptöku sést hvar konan stígur út úr bíl og hrópar ókvæðisorð að fréttamanninum og myndatökumanni og skömmu síðar kemur maðurinn aðvífandi og gengur í skrokk á honum. Hann var fluttur á slysadeild með brotin rifbein, skrámur og bitsár. Maðurinn og konan voru bæði handtekin og ákærð í kjölfarið.