Aaron Lennon bankar á dyrnar

Steve McClaren hefur aðvarað byrjunarliðsmenn enska landsliðsins og segir að Aaron Lennon geri kröfur á að fá sæti í byrjunarliðinu með frábærum innkomum sínum í leiki liðsins. Lennon lagði upp mark gegn Andorra um helgina og McClaren segir bindur miklar vonir við þennan unga leikmann.

"Það hefur verið mikill stígandi í leik hans síðan á HM og ég held að byrjunarliðsmennirnir séu margir hverjir að gjóa augunum á hann. Lennon er leikmaður sem kemur alltaf með eitthvað spennandi inn í leik liðsins þegar hann kemur inn sem varamaður og það má alltaf heyra klið úr röðum áhorfenda þegar hann sýnir listir sínar. Hann er leikmaður sem á sannarlega framtíðina fyrir sér og hver veit nema hann festi sig í sessi í liðinu. Það er sannkallaður lúxus fyrir þjálfara eins og mig að hafa sterka samkeppni um stöður í liðinu," sagði McClaren, en Englendingar sækja Makedóna heim í kvöld og verður leikurinn sýndur beint á Sýn Extra.