Eyjólfur ætlar að fara varlega

Nú rétt í þessu var að ljúka blaðamannafundi íslenska landsliðsins fyrir leikinn gegn Dönum í undankeppni EM sem fram fer annað kvöld. Fátt var um stórtíðindi á fundinum þar sem þeir Eyjólfur Sverrisson, Eiður Smári Guðjohnsen og Hermann Hreiðarsson sátu fyrir svörum í beinni útsendingu á NFS.

Eyjólfur ætlar að spila varlega gegn sterku liði Dana annað kvöld, hann segir leikinn réttilega byrja í stöðunni 0-0 og íslenska liðið muni fara varfærnislega inn í leikinn, enda sé danska liðið mjög vel spilandi.

Engin teljandi meiðsli eru í íslenska hópnum, sem verður sá sami og vann frækinn sigur á Norður-Írum um síðustu helgi. Kári Árnason hefur náð sér af veikindum sínum og þá verður Kristján Finnbogason áfram varamarkvörður í stað Daða Lárussonar sem er meiddur.

Annars má segja að Hermann Hreiðarsson hafi stolið senunni á bragðdaufum blaðamannafundinum í dag, því farsími hans hringdi látlaust á meðan fundinum stóð og virtist varnarjaxlinn eiga í mestu vandræðum með að slökkva á tækinu - enda uppskar hann hlátur félaga sinna sem sátu til borðs með honum.