Ben Thatcher slapp vel

Pedro Mendes segist vera búinn að fyrirgefa Ben Thatcher hjá Manchester City fyrir líkamsárásina á dögunum, en segir að leikmaðurinn hafi sloppið ansi vel með það sex leikja bann sem hann fékk frá félaginu í kjölfarið.

"Ég óttaðist það versta eftir atvikið, en er nú á góðum batavegi, kenni mér einskis meins og vonast til að fá að spila sem fyrst. Ég vil ítreka að ég er búinn að fyrirgefa Thatcher, en mér þótti hann sleppa ansi vel með sex leikja bann hjá félaginu. Mín skoðun skiptir þó engu máli í því sambandi, ég var búinn að segja að ég væri tilbúinn að segja mína skoðun á málinu ef þess yrði óskað, en svo hefur ekki verið. Ég vona bara að menn læri af þessu atviki," sagði Mendes, en enska knattspyrnusambandið á enn eftir að ákveða refsingu Thatcher.