Held að engan hafi órað fyrir þessu

Árni Gautur Arason, markvörður íslenska landsliðsins, var skiljanlega ánægður með sigurinn á Norður-Írum í dag. Árni sagðist hafa verið ánægður með að halda hreinu í leiknum og sagðist í samtali við Eirík Stefán Ásgeirsson, blaðamann á Fréttablaðinu, efast um að nokkur hafi þorað að vona að liðið næði þessum úrslitum.

"Þetta er draumabyrjun og ég held að engan hafi órað fyrir þessum úrslitum. Við lögðum upp með að vera mjög skipulagðir í vörninni líkt og gegn Spánverjum um daginn og það heppnaðist vel. Vörnin var að vinna vel fyrir framan mig og það er mjög gott að halda hreinu tvo leiki í röð. Það er líka frábært að byrja þetta á því að skora þrjú mörk úr þremur færum strax í fyrri hálfleik. Í fljótu bragði held ég að fyrri hálfleikurinn hjá okkur í dag hafi verið einn okkar besti í langan tíma," sagði Árni Gautur.