Aldrei heyrt áhorfendur baula á okkur á heimavelli

Lawrie Sanchez var afar óhress með varnarleik norður-írska liðsins gegn Íslendingum í undankeppni EM í dag þegar heimamenn lágu 3-0. Áhorfendur bauluðu á norður-írska liðið þegar það gekk af velli á Windsor Park og sagði Sanchez þá hafa haft fullan rétt á því.

"Varnarleikur okkar í fyrri hálfleik var skelfilegur og þeir nýttu sér það til fullnustu og komust í 3-0. Eftir það voru úrslitin nánast ráðin," sagði Sanchez í samtali við breska sjónvarpið. Áhorfendur á Windsor Park bauluðu á sína menn þegar þeir gengu af leikvelli í dag. "Þetta er í fyrsta sinn sem ég heyri áhorfendur baula á okkur á okkar heimavelli, en eins og við spiluðum í dag áttu þeir fullan rétt á því," sagði Sanchez og bætti við að hann gæti í fljótu bragði ekki séð neitt sérlega jákvætt við leik dagsins, liðinu biði mjög erfitt verkefni gegn Spánverjum í næsta leik og hann yrði nú að reyna að stappa stálinu í sína menn fram að þeim leik.