Óbreyttir stýrivextir á evrusvæðinu

Evrópski seðlabankinn ákvað að loknum vaxtaákvörðunarfundi sínum í dag að halda stýrivöxtum á evrusvæðinu óbreyttum í þremur prósentum. Greiningaraðilar telja líkur á að bankinn hækki vextina hins vegar í október.

Almennt var búist við þessari niðurstöðu en verðbólga dróst saman um 0,1 prósent á evrusvæðinu í ágúst og er nú 2,3 prósent.

Í Morgunkorni Glitnis í morgun kemur fram að evrópski seðlabankinn hafi hækkað stýrivexti fjórum sinnum á síðustu átta mánuðum til að halda verðbólgu í skefjum.

Verðbréfamiðlarar sögðu rólegt á hlutabréfamarkaði og í biðstöðu en að menn ættu ekki von á því að seðlabankinn kæmi á óvart. Helstu hlutabréfavísitölur lækkuðu lítillega í morgun á meðan beðið er eftir tilkynningu seðlabankastjóra.

Sérfræðingar telja að hagvöxtur hafi náð toppi á öðrum ársfjórðungi og að helstu hagvísar bendi nú til hægari hagvaxtar það sem af er ári, að því segir í Morgunkorninu.