ESB leggur til helming friðargæsluliðs

Evrópusambandsríkin leggja til helming hermanna í fimmtán þúsund manna friðargæslulið sem verður sent til Líbanons á vegum Sameinuðu þjóðanna. Jafn stórt lið líbanskra hermanna verður þar fyrir.

Kofi Anna, framkvæmdastjóri Sameinuðu þjóðanna, greindi frá þessu eftir fund utanríkisráðherra Evrópusambandsríkjanna með honum í Brussel í Belgíu í dag. Annan segir Frakka fara fyrir friðargæsluliðin fram í febrúar á næsta ári en þá taki Ítalir við.

Frakkar hafa heitið tvö þúsund hermönnum og Ítalar tvö til þrjú þúsund manna herliði.

Pólverjar hafa boðist til að leggja fimm hundruð hermenn til verkefnisins, Finnar tvö hundruð og fimmtíu hermenn, Belgar þrjú hundruð og tvo en níutíu til viðbótar síðar. Norðmenn ætla að leggaj til hundrað hermenn. Spánverjar og Þjóðverjar ætla að leggja til hergögn og Danir tvö herskip. Auk þess hafa yfirvöld í Bangladesh heitið tvö þúsund hermönnum til verkefnisins, Indónesar einni herdeild, Malasíubúar því sama og yfirvöld í Nepal einnig.

Liðið verður sent til Líbanons samkvæmt vopnahlésályktun Öryggisráðs Sameinuðu þjóðanna.

Ísraelsk stjórnvöld hafa ítrekað þá yfirlýsingu sína að herlið þeirra hverfi ekki frá Líbanon fyrr en friðargæslulið Sameinuðu þjóðanna komi á vettvang.

Javier Solana, utanríkismálastjóri Evrópusambandsins, hefur farið þess á leit að Ísraelar aflétti flug- og hafnbanni sínu á Líbanon.

Enn fjölgar í hópi Ísraela sem krefjast afsagnar Ehuds Olmerts, forsætisráðherra Ísraels, vegna stríðsins í Líbanon. Mótmælendur komu saman í Jerúsalem í dag til að láta óánægju sína með framgang stríðsins í ljós. Varaliðsmenn og ættingjar þeirra hermanna sem féllu komu saman við gröf Goldu Meir, fyrrverandi forsætisráðherra landsins. Vinsældir Olmerts hafa minnkað töluvert síðan til átaka kom milli Ísraela og Hizbollah-skæruliða í síðasta mánuði. Ný skoðanakönnun sýnir að stjórnvöld myndu taka fyrir hægri flokkunum ef kosið yrði í dag. Ísraelar ganga, að öllu óbreyttu, næst að kjörborðinu árið 2010.