Umboðsmaður Tevez segir hann á leið til Englands

Umboðsmaður argentínska framherjans Carlos Tevez heldur því fram að skjólstæðingur hans sé á leið til liðs við enskt úrvalsdeildarfélag í kjölfar þess að uppúr sauð milli Tevez og þjálfara brasilíska liðsins Corinthians. Tevez er einn heitasti framherji heimsins í dag og hefur verið orðaður við flest stóru félögin í Evrópu.

Þessi ungi og skæði framherji sýndi hvers hann var megnugur með argentínska landsliðinu á HM í sumar og í kjölfar tíðinda af deilum hans við þjálfara sinn eiga klúbbar í Evrópu eflaust eftir að reyna að landa honum fyrir lokun félagaskiptagluggans um mánaðamótin.