Lítið skorað í fyrri hálfleik

Fá mörk litu dagsins ljós í fyrri hálfleik í viðureignum kvöldsins í ensku úrvalsdeildinni, en síðari hálfleikur er nú hafinn í leikjunum sex sem standa yfir. Andriy Shevchenko skoraði mark Chelsea sem hefur yfir 1-0 gegn Middlesbrough.

Aston Villa hefur yfir 2-1 gegn Reading á heimavelli sínum, þar sem Reading spilar einum leikmanni færri eftir að Ibrahim Sonko var vikið af leikvelli. Kevin Doyle kom Reading yfir, en þeir Juan Pablo Angel og Gareth Barry komu Villa yfir. Ívar Ingimarsson er í byrjunarliði Reading og Brynjar Björn Gunnarsson kom inná sem varamaðuri á 36. mínútu.

Manchester United hefur yfir 1-0 gegn Charlton þar sem Darren Fletcher skoraði mark United með laglegum hætti, en þessi leikur hefur verið mjög fjörugur og fjöldi skota beggja liða hafnað í tréverkinu.

Benny McCarthy hefur komið Blackburn yfir gegn Everton, en markalaust er í leik Fulham og Bolton og svo í viðureign Manchester City og Portsmouth.