Við viljum fá Hargreaves

Sir Alex Ferguson, knattspyrnustjóri Manchester United, hefur staðfest að félagið hafi mikinn hug á að fá enska landsliðsmanninn Owen Hargreaves í sínar raðir frá Þýskalandsmeisturum Bayern Munchen.

"Við erum búnir að vera í samningaviðræðum við Bayern í nokkurn tíma og höfum mikinn áhuga á að fá leikmanninn í okkar raðir. Drengurinn vill líka koma hingað, svo vonandi finnst lausn á þessu fljótlega. Málið er í höndum stjórnarformannsins og ég treysti honum til að finna út úr þessu.

Það hefði vissulega verið betra ef við hefðum selt Ruud Van Nistelrooy til Bayern, því það hefði líklega einfaldað okkur að fá Hargreaves, en það þýðir ekkert að velta sér upp úr því," sagði Ferguson í samtali við breska sjónvarpið í dag.