Íslensk tónlist á Public Service hátíðinni

Apparat Organ Quartet, Trabant, Unsound auk plötusnúðanna Margeirs og Alfsons X munu koma fram á tónlistarhátíðinni Public Service í miðborg Kaupmannahafnar nú um helgina á vegum Iceland Airwaves og Icelandair. Public Service er ein flottasta tónlistarhátíð á Norðurlöndum og sú stærsta á sviði rafrænnar tónlistar (electronic music). Hátíðin er haldin af útvarpstöðinni P3 og danska ríkisútvarpinu, með dyggum stuðningi Kaupmannahafnarborgar.

Það sem af er þessari viku hafa tónleikar og garðpartý verið haldin í almenningsgörðum, skemmtistöðum og kaffihúsum víða um Kaupmannahöfn sem hluti af Public Service hátíðinni. Hún fer hins vegar ekki í gang fyrir alvöru fyrr en nú um helgina og er meginhluti dagskrárinnar í gangi frá fimmtudeginum 17. til sunnudagsins 21. ágúst í og við glænýjar höfuðstöðvar danska ríkisútvarpsins; DR Byen á Ørestad Nord. Þar er búið er að koma fyrir 3 innanhús- og einu útisviði. Aparat Organ Quartet, Trabant og Unsound koma þar fram föstudaginn 19. ágúst - og daginn eftir sjá plötusnúðarnir Margeir og Alfons X um fjörið.

Tilgangurinn með þessum tónleikum Airwaves á Public Service er fyrst og fremst að kynna Iceland Airwaves og íslenska tónlist fyrir Kaupmannahafnarbúum og þeim fjölmörgu Norðurlandabúum sem sækja Public Service.

Föstudaginn 1. september stendur Iceland Airwaves síðan fyrir sérstöku kvöldi á skemmtistaðnum VEGA í Kaupmannahöfn þar sem hljómsveitin Jeff Who?, llitamaðurinn Eberg og plötusnúðarnir Margeir og Alfons X troða upp. VEGA er einn glæsilegasti skemmtistaður borgarinnar og heldur úti öflugri dagskrá árið um kring með innlendum sem erlendum listamönnum. Snow Patrol, Hot Chip, Peaches, The Whitest Boy Alive og Sufjan Stevens eru meðal þeirra sem spila á staðnum á næstu misserum.