Drew Gooden semur við Cleveland

Framherjinn Drew Gooden hefur framlengt samning sinn við NBA-lið Cleveland Cavaliers til þriggja ára og hefur þar með bundið enda á miklar vangaveltur sem verið höfðu um framtíð hans. Talið er að Gooden muni fá um 23 milljónir dollara fyrir samning sinn og hefur forráðamönnum Cleveland nú tekist að framlengja samninga allra lykilmanna sinna á síðustu tveimur árum.

Nokkuð hefur verið um leikmannaskipti í NBA deildinni í sumar eins og endranær, en í kjölfar þess að Gooden náði samningum við Cleveland og reiknað er með að framherjinn Al Harrington semji við Indiana Pacers á næstunni, eru í raun aðeins tveir bitastæðir leikmenn eftir á markaðnum sem enn hafa ekki komið framtíð sinni á hreint.

Þetta eru þeir Bonzi Wells hjá Sacramento Kings og Reggie Evans hjá Denver Nuggets, en nokkur lið eru sögð á höttunum eftir þessum leikmönnum.