Öngþveiti á flugvöllum á Englandi

Bresk og bandarísk yfirvöld upplýstu í morgun að tekist hefði að koma í veg fyrir að hryðjuverkamenn sprengdu í loft upp farþegavélar á leið milli landanna. Ekki er flogið til Bretlands sem stendur og óvíst hvenær það verður hægt á ný. Algjört öngþveiti ríkir á flugvöllum þar í landi.

Breska lögreglan upplýsti í morgun að tekist hefði að koma í veg fyrir ráðabrugg hryðjuverkamanna um að sprengja í loft allt að tíu flugvélar á leið frá Bretlandi til Bandaríkjanna. Smygla átti sprengjum í fljótandi formi um borð í vélarnar með handfarangri farþega.

Tuttugu og einn maður hefur verið handtekinn vegna málsins sem hefur verið í rannsókn í nokkurn tíma. Lögregla leitar nú gagna í húsum í Lundúnum og Birmingham.

Bandarísk yfirvöld greindu síðan frá því að komið hefði verið í veg fyrir sprengjutilræði í flugvélum þriggja bandarískra flugfélaga, United, American og Continental Airlines.

Bandarísk og bresk yfirvöld færðu viðbúnað sinn á hæsta stig í morgun og er bannað að taka með sér handfarangur um borð í vélar sem fara frá Bretlandi, aðeins leyfist að taka með sér veski og vegabréf. Bandarísk yfirvöld hafa bannað farþegum að taka með sér drykkjarföng, hársprey og annað þvíumlíkt um borð í vélar sem fara þaðan.

Öryggisgæsla á breskum og bandarískum flugvöllum hefur verið hert til muna og má búast við töfum á flugi í dag og næstu daga.

Mikið öngþveiti er nú á Heathrow flugvelli og hafa stjórnendur hans beðið farþega að halda sig heima um sinn ef hægt sé. Engar vélar lenda þar sem stendur. Lokað hefur verið fyrir flug til og frá Gatwick flugvelli og bíða um tvö þúsund farþegar í röð eftir afgreiðslu á Stansted flugvelli.