Mig langar að lyfta Englandsbikarnum

Steven Gerrard, fyrirliði Liverpool, segist að mestu vera búinn að jafna sig á vonbrigðunum með Englendingum á HM og ætlar sér stóra hluti með liði Liverpool á komandi leiktíð.

"Það hljómar kannski einkennilega, en ég naut þess vel að spila á mínu fyrsta HM, þrátt fyrir vonbrigðin. Ég fékk að spila fleiri stöður en eina og náði að skora mörk, sem var einstaklega ánægjulegt. Nú er ég búinn að taka mér gott frí með fjölskyldunni og þá fer mann að klæja í að byrja að spila aftur. Við hjá Liverpool setjum stefnuna mjög hátt, höfum styrkt leikmannahópinn nokkuð og ætlum okkur að veita Chelsea harða keppni. Ég er orðinn afar óþolinmóður að bíða eftir því að fá að lyfta Englandsbikarnum," sagði Steven Gerrard.